Skol Diwan Ar Meziaer : emvod kelaouiñ foran e Gwinieg

D'ar Yaou 2 a Viz Ebrel, adalek 8 e 30 noz e vo aozet un emvod kelaouiñ foran e Gwinieg (sal liesimplij) gant skol Diwan Ar Meziaer bet digoret e Gwengolo 2008.

Tud e karg eus Diwan a vo war al lec'h evit kinnig Diwan deoc'h, en o zouez rener skol Diwan Ar Meziaer, (ar mont en-dro kevredigezhel, aozadur skol Diwan Ar Meziaer, an hentenn pedagogel). Laouen e vint o respont ouzh ho koulennoù.

Skolioù Diwan a zo Laik, digoust ha digor d'an holl.

A-drugarez d'an hentenn pedagogel dre soubidigezh, e teu a-benn ar vugale da vezañ divyezhek da vat. Desket e vez ar brezhoneg ganto dre un doare naturel hag e vez tizhet ganto ul live a varregezhioù heñvel e galleg hag e brezhoneg. Ar soubidigezh a ra berzh e skolioù Diwan abaoe muioc'h a dregont vloaz. Komz meur a yezh : ur binvidigezh hag ur chañs ouzhpenn evit ar vugale.

Ma 'z oc'h dedennet gant yezh ha sevenadur Breizh ha/pe m'ho peus bugale, deuit d'an emvod !

Titouroù a-zivout an emvod : Sonia Zaoumi-karget eus an diorren-Diwan : 02 98 21 33 69 pe 06 24 90 36 03.