Roidigezh ar priz lennegel brezhonek 2011
Priz lennegel brezhonek kêr Gwened 2011
Gerig Prezidant ar juri
Demat d'an holl,
Evel kelenner war ar brezhoneg e Kelc'h Sevenadurel Gwened ha Prezidant kevrenn «lennegezh dre skrid» Skol-Uhel ar Vro on laouen bras o welout e ya war gresk ar plas a vez roet d'ar brezhoneg war bep tachenn.
Evit ar wezh kentañ, amañ e kêr Gwened, e vo deroet ur priz lennegel d'un oberenn savet e brezhoneg. Un degouezh bras eo da enoriñ ar yezh 'zo tomm hor c'halon outi hag an holl re a ra ganti bemdez Doue. Tremen daou vil bloaz ez eus anezhi war beg an dud hag hi bev c'hoazh hiziv an deiz en desped d'an trubuilhoù ha d'ar skoilhoù lakaet war he hent.
Na pegen talvoudus eo ar priz lennegel, evit ar skrivagnerien, an embannerien hag al lennerien kar o bro, o lakaat splann ez eus ur wir lennegezh e brezhoneg. Skridoù a vez savet ingal diwar kement dodenn a ra buhez ar mab-den hag e brederiadennoù. A-drugarez d'an aotrounez François Goulard prezidant kuzul-departamant Mor-Bihan, David Robo maer kêr Gwened ha Gabriel Sauvet eilmaer e karg ar sevenadur eo deut da wir ar raktres am boa roet lañs dezhañ tremen bloaz zo bremañ ha bet fiziet ennon ganto, krouiñ ur priz lennegel brezhonek.
Ra vint trugarekaet evit se !
Yann an Aod
■Pep tra a vale evel tredanvoest ur c’harrtan ! Bale a ra gant ur blein mui (+) hag ur blein lei (-). Ur vro yac’h en istor o krouiñ sevenadur nevez diwar e stuzegezh tremenet, zo unan kempouezhet mat etre an daou vlein.
1/ Ar « stad » zo « beli », aotrouniezh, dreistholl rann « gourel », SPEREDEL (youlel, nadel, meizel) pe ivez « penn » ur vro. (+)
2/ Ar « gevredigezh », zo « rezid », frankiz, dreistholl rann « benel », PREDEL (trivliadel ha poellel) pe ivez « kalon » ur vro. (-)
3/ An « tiriad », a zo « diazez », douar, dreistholl rann « ALVEZEL » (danvezel ha gremmel) ur vro.
Er « Bretagne » hon eus an tri live : Un tiriad, ur gevredigezh hag ur stad. An tiriad hag ar gevredigezh zo breizhat (n’eo ket « brezhon ») hag ar stad zo gall. Ar « Bretagne » zo en istor gall peogwir ez eo, war an douar, ar stadoù a ra an istor. Neuze, n’eus ket eus « Breizh », nemet e labour an Emsav hag e brezhoneg nevez an Emsav !
Labour an Emsav a dremen goustadik, a remziad da remziad, er gevredigezh vreizhat gall. Ret eo dezhi atoriñ, dre he mevelion, frouezh dispac’hel dañjerus an Emsav evit e neptuiñ e kevredigezh ar « Bretagne ». Kenderc’hel a ra an Emsav da vont war-raok goustad en istor Breizh…
En holl vroioù war an douar, ar stadoù zo ar spered hag ar spered zo er yezh. Petra a fell dimp ? Adlakaat « Breizh » en istor ? Neuze, an traoù zo sklaer hag eeun. A betra hon eus ezhomm er Bretagne -se evit ober « Breizh » anezhi ma n’eo ket diorren ar Stad Vrezhon izek a zo an Emsav hiziv ?
Hon kudenn zo sklaer : Penaos stummañ sternioù politikel, « marc’heion », amaezidi o servijout ur framm, ur Stad Vrezhon nevez en istor ? Hag eñ ne vo ket evelse servijet an denelezh o reiñ skouer un adsav, adsav ar spered ? Ar gudenn n’eo ket lennegel. Se ne sell ket ouzh ar Stad. Se a sell ouzh trivliadoù ar gevredigezh.
Lennegezh e galleg, en arabeg, e brezhoneg, arnesadek pe get, a c’hell bezañ savet er gevredigezh « vreizhat », dindan ar Stad C’hall, gant Kouliz Kedezh, Al Liamm pe n’eus forzh reoù-all... N’eo ket kudenn an Emsav, ar Stad Vrezhon hag he servijourion a fell dezho i diorren ! Hon kudenn zo istorel, ar brezel a stad da stad, ha n’eo ket lennegel er gevredigezh …