Ur bern tud yaouank, perrukennoù oranjez, gwenn ha du pe bonedoù ruz gante, fent, ijin, ha c'hoant da vont war raok
Petra a chomo barzh penn an dud goude manifestadeg an 19 a viz Mae e Naoned ?
Prezegennoù Merret, Troadeg, Le Boulanger da vintin, prezegennoù Aita, Tangi Louarn, plac'h ar Bonedoù ruz goude merenn ?
Pe ar from da welout kement a dud yaouank mennet da zifenn ur vro digoroc'h d'ar brezhoneg ha da wirioù mabden ?
Pe c'hoazh mennozhioù tud gant fent a ijin : ur superman gwenn ha du, ur jeneral de Gaulle gwisket gant ur boned ruz ?
Nerzh ha startijenn a zo bet diskouezet hiziv e Naoned. Pas kement hag ar C'hataluniz gant 100 000 a dud, pas kement hag an Euskariz gant 100 000 a dud alies. Mallus eo diskouez omp unvan ha prest da vont war raok. Ne vo ket div wech ur spi ken bras da gaout an emrenerezh goulennet abaoe kement a vloavezhioù, kement a nerzh hag a labour dispignet gant un dornad a dud.
Da bep hini da heuliañ frazenn Montaigne neuze : «The true mirror of our discourses is the course of our lives».
Poent eo labourat asambles, forzh peseurt liv a zo gant ar berrukenn, pe ar boned, digor eo an hent.
■