Lleuwen barzhez ar Redadeg : setu ar varzhoneg kuzhet er vazh-test

Douget gant 1500 reder, setu an destenn savet gant Lleuwen, ar rederez pemdeziek

Ar Redadeg Pemdeziek

Karaez

a blij dezhi dihuniñ abred

Ar glav

mesket gant ma alan

ouzh ar werenn

ar gouloù deiz

Karaez

he livioù a red

a-dreuz ar prenestr :

Ur c'hazh gwenn o treuziñ an hent

Ar baraer o tigeriñ e stal

Ur plac'h yaouank o tont en-dro

eus un nozvezh karantez all

al leonad kozh ' n ur c'hwitellat

a gas e gi da gac'hat

hag ar paourkaezh klasker bara

'ya da glask e voued er marc'had

Hag em ranndi klet

ma dousig -

e gousk c'hoazh ouzh e groc'hen -

o roc'hal ha tiroc'hal

troioù kaer

hunvreoù kuzh.

Pokat a ran d'e dal

“Aet on ma dous”

hag ur pokig all.

C'hwezh vat dour-c'hwez ur c'henavo c'hwek

Hag ez an en-dro da redek

Ma redadeg pemdeziek

Evit sioulaat

Moarvat

Ma spered

Divec'hiet

Tamm ha tamm

war an hent

Lamm ha lamm

ar galon a ren pa redan

Ma - unan

Gant nouspet den all

Ne gomzomp ket 'met

Taolioù skañv

Hon treid

A l â r traoù

War an hent talm ar botoù

war an delioù war ' r riblennoù,

talm an treid, talm ar soñjoù

talm ma spered en traoniennoù

talm al lusk a zo er gwad

lusk an avel a-dreuz ar c'hoad

lusk ar vro a zo em fenn

Lusk ar gerioù d'am c'hanaouenn

B 'ez eus tud a red evit pellaat

Tud all a red da riboulat

Tud zo a red

da v ezañ moan,

da vezañ yac'h

ha lod all c'hoazh da zistignañ .

Redek a ran me 'vit

soñjoù

gwisket gant

lizherennoù -

Gerioù

Dalc'het

Evit warc'hoazh

Gerioù da zont

goude warc'hoazh

Warc'hoazh

War hent Breizh

E koulz

deiz pe zeiz

tadou-kuñv hon tadoù-kuñv

a vo en dro deomp ivez

gant bugale hor bugale

selaou hag e klevi

o mouezhioù o chuchuiñ

dindan hon treid,

a-us d'ar pri

da viken war an hentoù

Kontadennoù

C'hoarzhadennoù -

ar vro a-bezh a gomz

d'an hini a selaou anezhi.

Pep kammed war-raok

A gas da benn an hent

Dalc'homp da vont

Buan-buan

Pelloc'h-pellañ

Dalc'homp da vont

war hon douar deomp-ni.