Jean-Yves, ét tai qi mene la Consortéy de Contréy, pa ? Aloure acoute don, sembl-ti qé t'i és qheurû su les «langaïjes de Bertaigne». Vra ben, aloure, veunla ene afilonjéy de 6 perpozeriys pour fere a qé le galo s'erchome. Gn'a point de foleyeriy dens les perpozeriys-la, ren qé dou cai qe tu pourae metr a jouae mézë:
1- Chouézi ben chouézi le monde a qhi qé tu vas baillae des elijes !
Je n-n'ë deja ecrit des deplés su ela, meins maoçion pourqhi don qé dou monde qi ne prechent p'un brin de galo sont meinz baçadous dou galo e sont avivandae tant qé pu o la Contréy ! Ao jou d'anet gn'a dou monde capabls, dou monde q'il ont ecrit de cai de faïçon en galo, dou cai siençae ou ben de l'ecrivaïje, dou monde qi préchent galo yeûz ! Patrice Deriano, André Le Co, Rejis Aofra, Mickael Genevée, parème, les veu-la pouraen yetr minz conseillous siençae pour tout le cai q'i a a-revaïr o le galo. Admézë faot jetae le faillit: le monde qi n'savent pâs ren qé chinotae o des EU dens le bout devent yetr depouchae propr ou ben minz a se chevi de la patouézeriy françaeze e pâs rend d'aotr !
2- Idae a metr subout des ecoles deûlangaïjieres galo-françae ou ben galo-berton ou ben core des ecoles galèzes en ensevaïje.
Des classiës capabl i n-n'a deja, gn'a des siens q'il ont les dipllômes, la savancetéy e l'esperience su le cai q'a a-revaïr o l'ensegneriy. Aloure, pourqhi don qé je some a atrapae le gobion, a l'vae des connes come des bobiats ? Idae a l'vae des ecoles en galo, veunla ene sonjéy valentouze pour la Consortéy, pa !
3- Gaïjae les siens q'iraen a la formézon STUMDI.
Oh bondla, pour sur qi va avaïr de la hucheriy a leire paraille perpozeriy. Meins dame durant toué moués de temp, coment q'c'ét-ti qé le monde veqhissent, rouchent, ... ? Es siens q'araen ene vra sonjéy pour un metië en galo i farae qé la Contréy baille des elijes châq mei a sieudr la formézon. Ene meniere de gaïjeriy, vaïr !
4- M'nae ene berouéy de brutéy ben m'néy pour emboni e ennouviaozi l'imaïje dou galo e idae ès enterprinzes qi meneraen de la brutéy en galo.
Je n'së point portae d'tro su la doneriy d'elijes ès enterprinzes meins pour nos langues, fara ben se dépouézonae de la sonjeriy-la. Nos langues vont s'erchomae cant qé c'ét qé l'economiq sieudra la pouche. Dusse meins vra.
5- Tout le cai qé la Consortéy mene deuv metr le galo en adorçion.
Chaq paniaos, chaq parchéy, chaq licë arjantae o la Contréy deuvent metr le galo en adorçion.
6- Tournae en galo tout le cai menae e bani o la Consortéy de Contréy.
I n-n'a dou papië e des kilobits de manjae o la Consortéy, meins comben q'i n-n'a-ti de tournae en galo ? P'un brin. E l'anplla web permië ?
Tout le deplé-la pour dire q'astoure la mene dou galo ét menéy a l'egaopille, a la teurche mai le deu o la Consortéy rejiona. Vantié qé t'i as de la bone voulance Jean-Yves meins point grande epletance, «ça yi faet aotant come un co su l'zeus» pour dire vif. Aloure, Jean-Yves ou ben Lena, si qé vous v'léz erchomae le galo vra vraement, mézae faot avaïr ene mene bén m'néy. EPLETANTE !
■Mais oui, bien sûr, mon gars ! Qui serait intéressé par tes «écoles deux-langagières gallo-français» ou «gallo-breton» à part toi ? Un peu de réalisme...