Brasparz : 40 eilenn a huñvre!

Er bloaz-mañ emañ pevar devezh kentañ an TBF (Tro bro Frañs) e Breizh. Pep departamant (er rannvro melestradurel) a zo e heñchad dezhañ.

. Brest - Landerne 198 km Penn-ar-Bed

. Perroz-Gwireg – Gwerledan 183,5 km Aodoù-an-Arvor

. An Oriant – Pondi 183 km Morbihan

. Redon – Felger 150 km Ill-ha-Gwilun

Pet a rederien zo, evit loc’hañ ? 23 skipailh, 8 reder e-barzh pep-hini anezho, da lâret eo 184 reder

Brasparz, e-kreizig Menez Are.

Choajet eo bet ganiñ mont da vBrasparz, e-kreizig Menez Are. Evit bezañ trankillig. Evit kaout un tamm chañs da dapout fotoioù a-dost, evit inhalañ n’eo ket aer ar maezioù, nag hini ar c’herioù bras (Brest, Kemper) kennebeut, mes aergelc’h ur vourc’h sioulik kentoc’h.

War ma hent da vont eno, e-penn kentañ an abardaez, n’am eus gwelet kazi den ebet a-hed an hent a dizh-vraz ha dreist holl a-hed an hentoù bihan. Evel ma vefe goullo ar vro... Pelec’h emaint holl ? Dirak an tele, o sellet ouzh darvoud an deiz : rederien Tro bro Frañs (pe Tro Bro-C'hall, evel ma karit) o treuziñ kornog Breizh ? Pe war vord an hentoù o c'hortoz da welet ar rederien war varc'h-houarn, a-dost hag evit gwir?

O c’hortoz en a-raok.

Un eurvezh hanter a-raok ar rederien e tremen ur strollad a girri-samm. « Karavan vrudañ » a vez graet anezhañ. Ha setu profoùigoù a-bep seurt strinket pe stlapet d’an holl, ar vugale da gentañ-penn, mes ar re vraz ivez. Plijadur zo !

Un digarez eo ar prantadig-gortoz da gontañ kaoz gant an amezeien, reoù dostoc’h ouzhin. Tud eus ar vro, anezhe. Brav ! Emgavioù dic'hortozet krenn a c'hell bezañ, a-wechoù.

Dizale ! Emaint o tostaat !

Emañ ar c'hleier o vrallañ e tour iliz ar vourc’h, bremañ. Treiñ a ra un dornadig a viñsakell (betek pemp anezho) en oabl gris.

Resis eo an euriadur. Gortozet eo ar rederien amañ, e-kreizig ar vourc’h etre 3 eur 33 goude merenn (tizh a 44 km/eur) ha teir eur 51 (tizh a 40 km/eur). Poliserien war varc’hoù-tan. Gweturioù ofisiel. Ha setu ur reder en a-raok ! E unan-penn. Un toulladig kirri-tan teknikel, beloioù war o zoenn. Hag a-daol drumm…

Setu int !

Ar rederien ! Diouzhtu e vez klevet daouarn pep hini o stlakal, war vord ar straejoù ! Ha tud zo o huchal « Allez » (« Bec’h dezhi ! » e brezhoneg) pe « Vas-y ! » («Kae ganti ! » e yezh ar vro). Evel ur wagenn a energiezh eo. Evel

un tamm c’hwezh-avel o froñval. Teir eur 45 g.m. eo. Ne bad ket pell. Buan-buan e tremen ar rederien, gwisket gant chupennoù ha tokarnioù diwar o skipailh. A bep seurt liv zo ! 38 pe 40 eilenn diwezatoc’h ez eo echu an arvest. Aet int kuit dija. Evel un huñvre, ken buan hag ur virenn.

40 eilenn a blijadur. Tremenet int bet !…

Un gwallzarvoud a zo bet ha ne ouien netra diwarnañ: ur gouezhadenn vras a zo bet abretoc'h. Un eil gwallzarvoud a vo hag a welin war-eeun ouzh an tele : ur gouezhadenn all, brasoc’h c’hoazh ma vez posubl, un dek kilometrad bennak a-raok an erruout. Rakskrivet e vez (e lec’hienn ofisiel Tro bro-Frañs) emañ hent an devezh « accidentée » e live. Liveoù all a zo « plat » pe « montagne ». Ha gwir eo ez eo bet « gallzarvoudus » an devezh a-hirio.

A-benn ar fin ez eo aet ar maout gant Julian Alaphilippe. E doare brav ! Gantañ e vo gwisket ar chupenn velen e-pad an eil heñchad, dre Aodoù an Arvor.

MAJ 27 even 2021

N'omp ket bet chomet pell da welout ar chupenn velen cheñch a zivskoaz. Aet eo hi gant Mathieu Van der Poel, mab-bihan da Raymond Poulidor. E Mur (anv ar gummun a zo deuet da vezañ Gwerledan, e 2017). Kazetennerien-sport a lâr holl ez eo bet brav-spontus an daou zevezh kentañ e Breizh ! Daoust d'an div gouezhadenn...meur-spontus...! Staliet mat eo an emgann etre a re wellañ, war «an Dro» 2021, herveze... Betek an trec'h!

Gerioù:

. Heñchad pe Tennad hent an devezh (diwar geriadur Favereau www.arkaevraz.net)

. gwelet ivez geriadur Preder

Evit gouzout hiroc’h :

.ofisiel1 Tro bro-Frañs 2021 (tennad kentañ e Penn-ar-Bed, 26 even)

.ofisiel2 Tro bro-Frañs 2021 (eil tennad Aochoù-an-Arvor, 27 even)

.ofisiel3 Tro bro-Frañs 2021 (trede tennad Morbihan, 28 even)

.ofisiel4 Tro bro-Frañs 2021 (pevarvet tennad Ill-ha-Gwilun, 29 even)

.br.wikipedia Tro Bro-C'hall war varc'h-houarn (pennad e bzg)

.bretagne.bzh Les expressions du vélo en breton. Da skouer: «Mouiller le maillot» >>> “Reiñ bec’h” (pennad divyezhek, galleg/brezhoneg)

.argedour.bzh E Lanester, ur giton lakaet war well evit difenn ar yezh (pennad e galleg)

.argedour.bzh Bez e oe ar c'hleier o vrallañ e Pondi (28 even) Les cloches ont sonné à toute vollée à Pontivy (pennad e galleg)

. levr «Le coureur et son ombre», gant Olivier Haralambon, Premier Parallele édition, 2017. Evit kompren petra zo e penn ur reder war velo. Skrivet gant un reder a vicher pe a live uhel-kenañ («elite») e-pad dek vloaz, hag aet da brederouriezh diwezatoc'h.