Maketenn nevez ar KTKS (Kenstrivadeg Tuta Kelennerien ar Skolioù) zo bet embannet, gant ar gouarnamant, d'al lun 13 a viz Here 2008, met siwazh deomp, rout ebet ar yezhoù-bro en amprouennoù anezhi, na meneg ebet enni eus ar c'houkour ispisial evit tuta ha stummañ kelennerien ar skolioù divyezhek a oa bet krouet, goude bloavezhioù stourm, er bloavezhioù 2001/2002.
UDB n'eo ket evit kompren nag anduriñ un dismegañs a-seurt-se, a-berzh gouarnamant Nikolaz Sarkozy. Ne zeu ket war-soñj hini ebet eus ar gardidi hag an dilennidi a ra war-dro maketenn nevez ar KTKS zo eus ar yezhoù-bro, ur vezh ruz eo !
Ober fae war an 12500 bugel a zo e klasoù divyezhek Breizh, re Diwan, re Div-Yezh ha re Dihun, ober fae war o familhoù hag o skolaerien, n'eo ken. UDB a c'houl groñs digant Xavier Darcos ha gouarnamant ar Stad C'hall, lakaat an amprouennoù yezhoù-bro hag ar c'honkour ispisial, evit an tuta kelennerien divyezhek e maketenn ar « KTKS » nevez.
A-walc'h gant an dismegañs… UDB a c'houl groñs, o welet an difoutre ma vez ar Stad gant kelennadurezh hor yezh, ma c'hello ar Vretoned ha dilennidi kuzul rannvro Breizh, e Roazhon, kaout galloudoù hag arc'hant d'ober war-dro kelennadurezh ar brezhoneg, kement-se en ur dennañ gounit eus al lezennoù war an digreizennañ,
Da c'hortoz, emsaverien UDB yay war an dachenn da stourm asambles gant an holl dud a fell dezhe ma vo doujet eus gwirioù Pobl Breizh da vezañ desket en he yezh. Netra vat da gaout digant gouarnamntoù Pariz, deomp-ni Bretoned, e Breizh,da stummañ un dazont d'hor yezh!
Evit UDB Kreiz Breizh :Herve ar Gall
■