Karget mat eo bet implij-amzer Ofis ar Brezhoneg en dibenn-sizhun tremenet dre m'eo bet sinet ar garta Ya d'ar brezhoneg gant Benac'h, Louergad, Tregrom ha Plouvagor etre digwener ha disadorn. 23 c'humun o deus sinet ar garta e Bro-Dreger a-benn bremañ.
D'ar Gwener 15 d'ar 6 eur abardaez Maered Benac'h (an Ao. Jean David), Louergad (an Ao. Michel Guillou) ha Tregrom (an Ao. Gildas Troadeg) hag o c'huzulierien-kêr a zo bet bodet e Ti-kêr Benac'h evit sinañ asambles ar garta Ya d'ar brezhoneg dirak an It. Lena Louarn, prezidantez an Ofis. Kuzulioù-kêr Benac'h ha Louergad o doa votet evit tapout al label live 1 ha kêr Tregrom evit al label live 2. En he frezegenn eo bet displeget gant Lena Louarn e oa bet dibabet gant Benac'h ha Louergad daou ober pouezus-tre. Sellet a reont ouzh ar skoazellañ hag an diorren klasoù divyezhek en ur gumuniezh kumunioù a zo enniar muiañ a vugale skoliatet er c'hentañ derez divvyezhek evit Breizh a-bezh. (Daoust da se ez eo ret stourm bepred evit mirout d'ar c'hlasoù-se bezañ serret). An oberoù-mañ ma vezont kaset da benn vat a c'hello degas pelloc'h ar brezhoneg war-du an eil derez evit ma vefe un heuliad reizh gant kelennadurezh ar vugale. Mod-all e kemero perzh Louergad e koulzad brudañ ar c'helenn brezhoneg d'an dud deuet hag un enklask a vo graet e-touesk implijidi Ti-kêr Benac'h a-benn gouzout hag-eñ e komzont brezhoneg. Raktresoù kaer zo gant Tregrom ivez. Ouzhpenn kemer perzh ivez er c'houlzad « Deskomp brezhoneg » e vo klasket gant an Ti-kêr divyezhekaat en un doare sistematek e holl skoroù kehentiñ (kartoñsoù-pediñ, lec'hienn genrouedad, kazetenn an Ti-kêr, kemennadenn war ar responterez). Plakennoù straed ha panelloù glad a vo divyezhek ivez e 2009.
A-benn lidañ an darvoud war un ton bras e oa bet pedet holl vugale ar skolioù divyezhek da zont da ganañ
D'an deiz war-lerc'h eo bet degemeret an It. Lena Louarn e Ti-kêr Plouvagor gant an Ao. Yves Loillieric, maer, gant tud pedet eus ar vro, bugale ar skolioù divyezhek en o zouez.
O kreskiñ buan emañ Plouvagor e kreizig-kreiz Kumuniezh kumunioù Gwengamp hag he deus divizet cheñch he fanellerezh penn-da-benn ac'hann da dri bloaz. E 2011 e vo divyezhek kement panell (panelloù mont-tre ha mont e-maez ar gumun, panelloù henchañ, panellerezh an Ti-kêr hag ar savadurioù dindan e zalc'h). Votet ez eus bet ivez gant ar C'huzul-kêr evit un ober a glot gant ar politikerezh yezh : an holl gartoñsoù-pediñ embannet gant an Ti-kêr evit abadennoù sevenadurel pe get a vo divyezhek. A-benn kas da benn vat an holl oberoù-mañ ez eus bet sinet ur gevrat-kefridi etre Plouvagor hag an Ofis.
■