Gervel a ra Strollad Breizh da vanifestiñ en Oriant, d’an 31 a viz Meurzh o tont, evit Diwan hag evit ma vo anavezet ar brezhoneg evel yezh ofisiel e Breizh.
Treuzkas d’ar Rannvro ha d’al Liger-Atlantel ar galloud hag ar budjed evit ar sevenadur hag ar c’helenn brezhoneg a zo ar bazenn gentañ rekis evel-just. An holl ziaesterioù a chomo avat keit ha ma ranko ar Vretoned marc’hatañ bruzhun gant ar Stad C’hall hag a zo bet a-viskoazh he fal distruj hor sevenadur. Embann a ra Strollad Breizh e genskoazell e-keñver ar gerent, ar skolidi, ar gelennerien, ar c’hevredigezhioù sevenadurel a ra o seizh gwellañ bemdez evit ma chomo ar brezhoneg ur yezh vev ha poblek e Breizh.
Ret-mat eo bremañ mont pelloc’h ha kas ar stourm war an dachenn bolitikel: lakaat war sav ur gouarnamant breizhat ha demokratel a zoujo da wirioù mab-den hag da wirioù ar Vretoned. Diskouez a ra Diwan an hent mat evit an dazont ha dleout a ra kaout ur statut publik dizalc’h a zere gant he dibaboù pedagogel.
Evit Strollad Breizh, Gérard Olliéric prezidant
■