"Ar voger a zo dirazomp, c'hwec'h miz hon eus evit terriñ anezhi" eme Alfonsi e GBB
Pedet e oa bet François Alfonsi e Gouel Broadel ar Brezhoneg ba Langonnet hiziv, asambles gant Erwan Balanant, Paul Molac, hag ivez Prezidanted Diwan, Andre Lavanant, Andrew Lincoln, Padrig Hervé ha Yann Uguen.
An daol grenn gentañ a oa diwar ar soubidigezh. Ha ret eo termeniñ, ur wech adarre, petra eo ar soubidigezh ? Un hentenn, ur bedagogiezh ? N'eo ket lavaret pep tra diwar ar sujed-mañ dija, ha n'eo ket splann c'hoazh eo ur sistem efedus simpl kenañ : lakaat ar vugale da vevañ e skol vamm tout an devezh skol gant tud a gomz dezhañ ur yezh ha n'eo ket dre ret hini an ti ? Se vez graet e pep lec'h er bed, e lec'h emañ kerent ne gomzont ket yezh ar vro, da skouer. Tamm ha tamm e vez komzet ar yezh gant ar bugel. Ha tamm ha tamm e vez silet program galleg gant eurvezhioù galleg ret. Meur a wech oa bet prouet (ha ne vez ket graet ken, aon gant an Deskadurez Stad da wirikaat ar pezh a zo bet diskouezet dija) e oa ken barrek bugale Diwan e galleg eget ar re skoliataet e-barzh ar sistem unyezhek.
An eil lodenn a oa gant an dilennidi tro dro d'al lezenn Molag. Ha setu an daou depute Molag hag Erwan Balanant o tisplegañ ar votadeg, ar Vonreizh da cheñch. Amzer a chom, pe pas ? Ha tremen a raio un dra bennak a-raok dilennadeg ar Prezidant ? Ha neuze ? Gortoz pell, gortoz gwell ? N'eo ket soñj Molag, ha komzoù sklaer Alfonsi a zo da selaou aketus : "arabat koll amzer, dirak ur voger emaomp, ret e vo terriñ anezhi. "
N'eo ket echu ar stourm tudoù, ret e vo mont war ar straedoù c'hoazh. N'eo ket tout lakaat un tamm brezhoneg war baperoù an dilennadegoù. Ret e vo, ur wech adarre, saveteiñ ar soudard Diwan, asambles gant ar C'horsiz, an Okitaniz, an Elsasianiz, an Euskariz. Bec'h dehi !
■