Andre Lavanant, Tangi Louarn, Stephanie Stoll ha Yves-Marie Derbrée : un daol grenn buhezet gant Mikael Baudu
Un hanterkant bennak a dud er sal, brezhoneg ba genou an dud, dre chañs, daoust d'an dafar treiñ a vanke evit an nann-vrezhonegerien.
Kreñv oa komzoù ar re yaouank e beg Yves-Marie, gant ar c'hoant e yafe buanoc'h an traoù, en un doare efedusoc'h. Stephanie Stoll a lavare pegen diaes e oa kaout postoù, mont war raok evit Diwan, goulenn an aluzenn... Gant André emañ an tu kleiz war an hent fall.
Hag evit Tangi Louarn, eo ivez d'ar re a gomz brezhoneg bemdez, er familh, evit al labour, da labourat gwelloc'h kenetrezo : n'eus ket mui eus an UGB (Unvaniezh ar Gelennerien war ar brezhoneg), ar strategiezh da gas asambles n'eo ket resis a-walc'h...
Ha goude, da noz, dirak kreizenn Glenmor leun c'hoazh a dud oc'h eskemm, o komz brezhoneg dirak ur banne pe o renkañ al levrioù e koufr ar girri-tan, e oa ar re gozh hag ar re yaouank o kenderc'hel da sevel raktresoù.
Goude ur vanifestadeg un tamm c'hwitet (2000 pa oa 15000 e Kemper...) e vo ret d'ar vrezhonegerien dihuniñ ha mont pelloc'h evit cheñch penn d'ar vazh.
Ha kavout an doare efedusañ da gaout ur bolitikerezh yezh a yafe pelloc'h, mod-all e teuio da wir diougan Nolwenn Korbell da vintin, hag a oa o keñveriañ ar brezhoneg ouzh ur voger maen... kouezhet en he boul... Poent eo adsevel anezhi.
■