Pa vez roet ul liv romantel d'ur film...

"Roz-mouk ar c'huzh heol... livioù romantelezh ar Barzaz Breizh" Setu komzoù Ronan Hirrien, ur sevener brudet e bed an teulfilmoù evit Frañs 3 Breizh.

Anavezout a ra mat hag al lennegezh dre gomz ha bro Finland. Evit ar film-mañ eo bet o welet Breizhiz - Yann-Fañch Kemener, Brigitte Kloareg, Loïc Jadé – ha Finlandiz – Pekka Huttu-Hiltunen, Kristina Kuusisto – evit klask aesaat treuzkas ar glad kanet e brezhoneg, hag e finneg e Karelia Finland ha Rusia. Kement-mañ tost da zaou c’hant vloaz goude ma oa bet lakaet war wel ar gwerzioù kozh gant lenneien, e penn-kentañ an XIXvet kantved, pa voe embannet ar C'halevala e 1835, bet dastumet e Karelia, hag ar « Barzaz Breiz » e 1839, bet dastumet e Breizh. Eus ur festival d’unan all, eus ur gentel d’unan all e reomp anaoudegezh gant ar glad kanet-se hag e klaskomp gouzout perak ha penaos treuzkas ar memor kanet d’ar vugale koulz ha d’ar re vras.

Bugale e bro Vigouden o kanañ Gousperoù ar raned ha tud kozh o kanañ e finneg en doa lakaet Ronan en e istor. Kroget gant ur c'huzh-heol, fin ur bed, hag echu gant ur sav-heol, levezonet kalz gant an "Nuit celtique" savet gant Donatien Laurent ha Mikael Treger, setu ur film leun a skeudennoù da gompren tamm ha tamm.

Kinniget oa bet da Ronan e-pad an eskemmoù zo bet goude skignadenn ar film sevel un doare mouezh off evit mont donoc'h e danvez ur film pinvidik a gomz eus div oberenn bennañ sevenadurioù Finland ha Breizh : ar C'halevala hag ar Barzaz Breizh.

Gant Ronan ez eus bet sevenet ur film nevez diwar-benn an haiku, barzhoniezh ar brimded (ha n'eo ket barzhoniezh ar memor evel ma oa e "Pa guzh an heol") a vo skignet e gouel al levrioù d'ar sadorn 24/10 da 6e e sinema "ar C'hazeg c'hlas", e kichen ar saloñs (ha war France 3 d'ar sul 8 a viz Du da 11e vintin). Goude "Paotred al loc'h" ur film fromus ken-ken, setu bloavezh Ronan Hirrien o kenderc'hel...