Ouzhpenn 28 vloaz bremañ emañ Diwan o pleustriñ gant ur servij kelennadurezh e brezhoneg abalamour da vankoù an Deskadurezh Stad. Evel ma vez graet en holl skolioù a implij pedagogiezh ar soubidigezh yezh, ne vez ket sellet ouzh ar yezh evel un danvez kelenn met kentoc’h evel un doare evit eskemm, evel pa vefe ur media "leun-amzer".
Ul lec’h a-bouez eo ar skol evit deskiñ hag eskemm, hogen kement mare e buhez ar vugale hag an dud vras a zo tro ivez da eskemm e brezhoneg : lenn, c’hoari, sellet ouzh abadennoù, sportoù, internet, kan, kreizennoù vakañsoù, skinwel, skingomz...
Setu perak e soñj Diwan ez eo a-bouez-kenañ e vefe eus ar skingomzoù brezhoneg. Meur a skingomz kevredigezhel, gant nebeud a dra, o deus diskouezet e oa ar servij-se ret ha poblek. Ret eo anzav avat penaos ne vet ket doujet d’o fromesaoù gant ar radioioù stad a “servij publik“, dreist-holl evit ar brezhoneg. Er raktres politikerezh yezhel savet gant Rannvro Breizh hag a zo bet votet a-unvouezh koulskoude e vez meneget fraezh ez eo ar pal ”skignañ dre skingomz e brezhoneg war Breizh a-bezh”...
Setu perak : E kav deomp ez eo pouezus ha reizh gellout selaou e Breizh skingomzoù a-zoare hag a skign e brezhoneg Notenniñ a reomp mat petra eo polititikerezh ar Stad war dachenn ar skingomzoù graet " digreizennet " anezho : - ar bilañs war an dachenn zo fall-put e-sell ar palioù hag ar peadra foran, - ar pep brasañ eus programoù ar radioioù "Glaz" na zoujont ket da sevenadur breizh. Goulenn a reomp e vefe lakaet da vont en-dro an abretañ ar gwellañ ur skingomz rannvro a servij publik, o skignañ war 5 departamant Breizh. Seurt raktres a rank bezañ kaset en-dro gant Kuzul Rannvro Breizh.
Evit difenn an holl arguzennoù-se e c’halvomp an holl dud a soñj dezho ez eo ar brezhoneg ur yezh sokial ha bev da zont da vanifestiñ e sez RBI, straed Falkirk e Kemper d’ar 25 a viz meurzh 2006 da 3 eur goude merenn.
Burev Diwan 17.03.06
■