Brezhoneg ha kezeg brav 'ba 'r Pouldu

Ur gouel evit an douristed ? N'eo ket sur an dra-se..

Pa oa Pierre o prenañ ur jav brav gant Lili Monfort, e Cotonnard e 2012, e oa peogwir en doa gwelet anezhañ o vont kuit d'ober tro an tachennoù kampiñ, da geñver gouel Diwan, en hañv, deus tu Kloar.

Jo ha Jorj a zo tud sot gant ar c'hezeg ; da vare Nedeleg, dirak ar stal levrioù Penn-da-Benn, e vezont gwelet bep bloaz war blasenn Sant-Mikêl e Kemperle o kas bugale, brezhoneg etrezo alies.

Michel Flecher, paotr Sant-Jermen, a gomz brezhoneg bemdez, hag e fin miz Eost e vo e penn Gouel ar Vezhinerien, oc'h adober taolenn Gauguin war draezhenn ar Pouldu, gant kezeg pounner niverus, ebeulien o vont d'o heul alies, o kas karradoù bezhin.

Madalen ? O heuliañ kentelioù noz e brezhoneg e skol Diwan Kemperle e vez, laouen o kas bugale ha tud deuet d'ober troiadoù war gein ur gazeg boas da vont da lidañ euredoù ha gouelioù, e pep lec'h. Ar vaouez gentañ bet tapet ganti an diplom kas kezeg e Breizh. Peurvuiañ eo paotred a vez gwelet, met ar re o deus bet gwelet Madalen, un tog chichant ganti war he fenn, o kas ur gazeg wenn, o deus komprenet buan eo-hi ken barrek hag ar baotred !

Kezeg : ur glad ? Komz brezhoneg : un dra echu da vat ? Pa vez klevet ouzhpenn gourenerien o komz brezhoneg etrezo, maouezed o fardañ krampouezh oc'h eskemm e brezhoneg, merc'hed yaouank o kanañ, e vez peadra da c'houlenn : ha marv eo hor yezh e Breizh, aotrou Maille ? Ha tud yaouank punk o servijout krampouezh e-pad ar gouel hag o vont e brezhoneg, n'eo ket posubl an dra-se marteze ?

Un avañtur denel eo aozañ ur gouel er vro. Gant 60 den a youl vat, ha 60 den war al leurenn, a youl vat ivez kazi an holl anezho, e oa bet aozet gouel Diwan ar Pouldu, ha bodet ur 1 000 a dud dindan an heol, familhoù, bugale, tud ar vro...

Peadra zo da hunvreal ha da soñjal e vo, marteze, un deiz bennak, ur gouel e brezhoneg heñvel ouzh ar gouel aozet e bro Euskadi : digor d'an holl, met yezh ar vro o vezañ klevet war al leurenn, lennet war an traktoù, komzet gant an dud kement ha ma vo tu…