Brezhoneg e Lannuon : poent eo cheñch tizh !

Hirie he deus kinniget kevrenn Ai'ta ! Treger un oberenn nevez e kreiz-kêr Lannuon : distaliañ an holl banelloù “takad 30” bet staliet gant an ti-kêr warlene. Petra 'zo kaoz, 'mut-hu ? Divrezhonek int tout, daoust d'ar pezh a oa bet sinet gant ar gumun er garta “Ya d'ar brezhoneg” ha d'ar pezh en devoa lâret an aotrou maer dimp, pa oamp en em gavet gantañ e miz Gouere 2012, da heul ur prantad eskemmoù tenn dre ar mediaoù. Meur a lizher a oa bet kaset d'an ti-kêr dibaoe an emvod-se, met chomet int holl direspont ! Setu perak e felle da dud Ai'ta ! degas soñj deus an holl draoù-se d'an dilennidi… met war an dachenn, ar wech-mañ.

Un daouzek panell bennaket a zo bet degaset en-dro d'an ti-kêr neuze, ha profet ur banell vrav en eskemm dezhe. « Brezhoneg d'an daoulamm » a zo skrivet war homañ, gant skeudenn ur c'harr-nij. Kar brav eo staliañ ur banell divyezhek gwech ha gwech all, met pell 'mañ Yann Vrezhoneger diouzh e gazeg memestra ! Ur wir bolitikerezh evit ar yezh an hini a c'houlennomp groñs digant dilennidi Lannuon, ha da gentañ :

- tapout label 2 ar garta « Ya d'ar brezhoneg », evel ma oa bet prometet en 2006 (ha gortoz a reomp c'hoazh e vije doujet deus ar pezh a oa bet sinet !)

- kas ar brezhoneg war-raok en holl doareoù-kelaouiñ ofisiel (pennadoù-skrid e kelaouenn an ti-kêr ; treiñ an titouroù embannet gant ar panelloù-niverel ; bruderezhioù ha folennoù-nij en div yezh…)

- sevel ur greizenn-dudi e brezhoneg (evel 'zo bet graet e kêrioù all deus ar vro) evit kinnig a-bep seurt abadennoù, d'ar merc'her hag e-pad ar vakañsoù, d'an holl vugale hag a zesk brezhoneg e skolioù Lannuon ha tro-war-dro…

Thierry Gallen, penn-rener ar servijoù, en deus asuret dimp e vefe kadarnaet live 2 ar garta dizale… gortoz pell, gortoz gwell ! Memestra e chomfomp war evezh bras en Lannuon, e-lec'h m'emañ o chom un toullad mat ac'hanomp. Evit ar pezh a sell deus al lec'hioù all e vroudomp an holl dud tomm ouzh ar brezhoneg da c'houlenn kontoù digant o dilennidi : goulenn groñs gante kas ar brezhoneg war-raok e buhez foran o c'humun… ha neket sinañ ar garta peogwir e ra chik er mediaoù ha chom hep ober mann ebet da c'houde, peotramant an traoù aesetañ tout ha mat pell 'zo !