Kenavo Akadia, Demat Asturias !

Echu ar FIL gant muioc'h eget 200 000 arvester deuet deus a dost ha deus a bell...

Emvod ar Gelted, Gouelioù an Oriant, berzh o deus graet c'hoazh an aozerien gant ur festival etrevroadel, daoust ma oa bet rebechet dezho bezañ dibabet bro Akadia ha kalzig a draoù e galleg. E Skos nevez, da skouer, ez eus kalzig a sonerien hag a ganerien a gan e gwezelleg. Amañ avat oa bet degemeret gallegerien dreist-holl. En un tu all e oa dedennus-tre da welout penaos o deus tud Akadia adperc'hennet ar galleg pa ouzer e oa hanterkant vloaz 'zo kazi an holl o komz saozneg. Divyezhek int, ha war al leurenn e veze lavaret «Amis français, bnjour!», met a-dreñv, saozneg nemetken.

Pismigerien o deus merzhet ivez e oa ur gartenn bro Breizh gant pevar departamant e ti ar C'hembraiz, hag e oa RTL e penn ar jeu e lec'h France Inter. Pismigerien all a lar eo «foar an triskell» emvod ar Gelted...

Hag en tu all e vez gwelet ur bern tud, ur mor a dud e straedoù an Oriant, e-pad an abadennoù. Tud kozh ha tud yaouank, tud ar vro ha touristed, tud paour ha tud pinvidig, sonerien ar bed a-bezh, 60% eus an abadennoù a oa digoust. Evit an danserien eo 10 devezh dañs digoust «non stop» gant ar sonerien hag ar strolladoù gwellañ a zo e Breizh. Evit ar re a blij dezho al levrioù, Egor ar gomz gant tabutoù ha tud interessant-tre. Me lâr deoc'h, ne c'heller ket chom diseblant pa vezer en Oriant !!!

EGORENN AR GOMZ

Tabutoù dreist ha fentus. Alan Kervern, Nono, Michel Nicolas ... ganto eo bet diskouezet nerzh skrivagnerien, treserien ha kazetennerien Vreizh. Brav ar brezegenn diwar kevrinoù Breizh : piv oar eo 350 lec'h kevrinus e Breizh ? Penaos kompren gwelloc'h mojennoù'zo gant sikour lennadenn kontadennoù Skos hag Iwerzhon ? Barzhonegoù lennet da 15e oant ket aes da heuliañ. Ha kae al levrioù zo da wellaat : mat e vefe ober pontoù etre saloñs al levrioù Karaez hag an Oriant evit ma vefe bravoc'h ar pezh a vez diskouezhet, n'eus levr ebet e brezhoneg pe kazi. Ha levr ebet e saozneg, iwerzhoneg, yezh keltiek ebet ... Perak ket kinnig da Livre et Lecture en Bretagne ur c'henlabour gant skrivagnerien etrekeltiek ?

EGORENN AR MORLU

Dizingal an traoù, gant 4500 plas en o sav ha 2000 plas azezet, re vras pe re vihan e oa bet hervez an abadennoù. Siwazh evit tud Breizh, 300 den hepken evit Buffy sainte Marie, un Indianez dispar bet e Woodstock hag e penn ar stourm evit an Indianiz hag ar merc'hed. Leun chouk evit Buena vista social club ha tud leun a levenez, arvesterien o leñvañ, ma Doue, biskoazh kemend-all ! Pebezh from.

Ne oa ket heñvel gant Africa Celtic sound system : trouz, meskaj gant tud du o wiskañ ur c'hilt, hag ur paotr o c'hoari gant mekanikoù elektronek ... Ha dibaboù drol an aozer : perak lakaat asambles ar sonerezh-mañ gant strollad De Dannan ha Frankie Gavin ? Re zisheñvel, arabat mont re bell memestra ...

SAL CARNOT HAG EGORENN VREIZH

Brav an aergelc'h en daou lec'h, re yaouank ha strolladoù yaouank gant Thomas Moisson dindan an deltenn vras ha koubladoù daou ha daou ha danserien «hengouneloc'h» e sal ar sportoù. Met ne vern, alies e veze graet tro an daou lec'h. Digoust, leun a dud, netra da rebech, strolladoù nevez a vez dizoloet pep bloaz gant Thomas Moisson. Marteze un tammig muioc'h a dud o tont eus bro Dreger ha bro c'hallo a vefe mat da selaou ?