Skol-hañv 2012 aozet gant KEAV: un trede sizhunvezh staj e Lesneven, 26-31 a viz Eost

Skol-Hañv 2012 aozet gant KEAV (Kamp Keltiek ar Vrezhonegerion); bez' e vo un trede sizhunvezh staj ar bloaz-mañ e Lesneven e skol Labour-douar an IREO (hent Plouider) etre ar 26 hag an 31 a viz Eost.

Evel en holl stajoù savet gant KEAV, e vo kinniget d'an dud gwellaat o live yezh dre vevañ e brezhoneg penn da benn ar sizhun, en holl degouezhioù ar vuhez pemdez kenkoulz hag en obererezhioù liesseurt a vo kaset a-hed ar staj. Er sizhun staj-mañ ne vo ket savet a gentelioù renket dre o live. Pouezet e vo war an deskiñ dre ober : an eskemmoù etre ar stajidi a-hed an deiz, pe er strolladoù labour m'o-do lakaet o anvioù peotramant gant ar vrezhonegerien eus ar vro.

Tro a vo da gas ar gaoz gant brezhonegerien eus Bro-Leon hag a vo displeget ganto perzhioù dibar ar c'horn-mañ eus ar vro en ur vont da welout lec'hioù anavezet tro-dro da Lesneven : mirdi Lesneven, lec'h ma vo aozet ur c'hoari evit ar vugale, ha Meneham, ur vrav a gêriadenn gwechall war an aod, ha mirdi ar Vezhinaerien e Plougerne gant un droiad war ar c'horejoù, hag ar Folgoad displeget d'ar stajidi gant tud Mignoned ar Folgoad, hag, evel-just, un dro-velo dre ar vro Bagan, lakaet war-sav nevez zo, gant Ti ar Vro Lesneven.

En tu all eus an degouezhioù-se hag a vo boutin d'an holl stajidi e vo ivez prantadoù labour gouestlet d'ur roll temoù hag a vo goulennet digant ar stajidi choaz unan anezho : “brezhoneg er ger”, “ober anaoudegezh gant un embregerezh eus ar vro”, “bed ar vezhinaerien” hag “istor Lesneven hag an tro-war-droioù”.

Skipailhoù bihan a vo savet diouzh an temoù dibabet gant ar stajidi ma c'hellint eskemm pelloc'h ha labourat diwar an danvez o-do daspugnet e-kerzh an troioù dre ar vro pe dre eskemm gant ar vrezhonegerien eus ar c'hornad.

E-kerzh an troioù-se e c'hello pep skipailh stajidi sevel goulennoù, kemer poltredoù ha dastum peadra da labourat a-stroll evit sevel ur pennad rentañ-kont hag a vo presañtet d'ar stajidi all e fin ar sizhun.

Setu amañ da heul an temoù-labour a vo goulennet digant ar stajidi choaz unan anezho:

• Brezhoneg er gêr (gant Divskouarn)

• Darempredoù gant un embregerezh

• Darempredoù gant bezhinaerien Plougerne

• Istor Lesneven hag an tro-war-dro

Ur prantad staj : 250€ (Priz evit ar c'hentelioù, boued ha lojeiz)

Studierien ha tud dilabour : 220€

Evit en em enskrivañ pe kaout titouroù ouzhpenn:

Keav - 22 hent Mouliouen 29000 Kemper, pgz : 02 98 95 59 31

www.keav.org

keav@wanadoo.fr