Le galo s'erchome e les souétes galeizes s'erchignent
Ca qa degrigne dens le Galo ! Mézë qé n'ét pu emeillant de huchae pour le galo sembl-ti, veunla de la recllameriy a s'erivae de tout bords e côtës ! Le cou-li ét ene bande de souétes q'i se metent d'asembl pour ecri un deplet de recllameriys a la Consortéy de Contréy. Véïr, v'éz ben lû, ene bande de souétes galeizes qi se metent d'asembl. Veunla core dou qai nouviao de pu dens le galo seben ! Diq'eyou q'ol ira l'agheroureriy-la ? Dame, faot point fere son mofignou, les souétes dou galo...souétent admézë e n'en veunla ene bielle hate ! Aloure qhi qé gn'a don dens le deplet-la : Permië ét contance qé farae depouchae la fraze « lange bertone e galo » dens les parchas de la Consortéy de Contréy. Et vra qé gn'a ao qai yetr futë de leire paraille chôze. A leire la fraze-la le monde ont core ao runje qé le galo ét d'aotr chôze q'ene lange. Ou ben core q'ol ét point bertone (meins deude eyou q'ol ét-ti don ?).
Deça les etourous dou galo sont ergretants qé les veûs enchaïrjës dou galo a la Contréy ne demandent point lou conseils és siuns des souétes dou galo. Ben vra dame ! Le monde enchaïrjae des langes bertones a la Contréy araen-ti devoçion a fere paraille come les prefets ou ben d'aotrs elezûs de méme ?
La touézieme cartelle dou deplet-la a a-revaïr o le melië q'ét faet entr le galo e le berton dens les sonjéys a la Contréy. Et ben vra qé les siuns qi se chouissent dou galo e dou berton n'i qenaessent pâs greu... su le galo pour dire vif. E, ao parsu, a chaq faï qé gn'a des sonjéys pour le galo les siuns-la s'orinent permië dens dou qai qi fû sonjë pour le berton. Notre lange ét ene meniere de « cinqhieme reu de la carighelle », pa.
Les qaterieme e cinqhieme point ont yeûz a-revaïr o l'arjient. Dame ben sûr i n-n'a pâs assë de minz dens le galo. Meins dame sembl-ti qé les siuns q'ont ecri le deplet-la vouraen qé les elijes iraen a avivandae des « missions de structure », je vourae ben n'en savaïr pu fô su les faillits « missions »-la mai...
Le point 7 ét li pu gandillouz. Ca q'a a revaïr o les paniaos. A leire les ecrivous, farae qé la Contréy se chouisse pu fô dou galo céz yelle, vra ben ! Meins farae etout qé cant q'c'ét qé gn'a des paniaos de piqhae qheuqe part dens le Peï Galo, le galo vienrae en permië e le berton dessour. Vra ben la etout ! Come de just e de ben entendû gn'ara des degrignous a voulaïr qé le berton s'rae olmont de haot ou de bas meins dame nouna ét norma, ét dou cai de raezon qé le galo s'rae pu haot qé les aotrs langes (berton e françaez) dens le Peï Galo pa. E paraille, faot qé le berton s'rae pu fô en adorçion en Basse-Bertaigne (o le galo par dessour). Meins dame evant qé de recllamae paraïl chôze farae ventiés fere d'aotr qé les pitiës pa'la, pari. Les bertonouz yeûs i n'en menent dou drao pour lou lange e depés berouéy core ! Et-ti de domé céz les etourous dou galo ?
Le point 7 ét, li, vra interessant etout. Les ecrivous demandent a qé le galo ne s'rae point le faillit raport a qé j'ecrivons point tertout o la meme meniere d'ecrire. A-don, en-vû le drao qé gn'a zû (e qé gn'a core astoure) entoure de l'ecritûre céz les berzonètes, le monde-la n'ont pâs ao qai délae su nous. E, permië, la meniere d'ecrire ne deut point yetre un digaré pour ne pâs yetr de la ville-dounant ou ben core léssae le galo pacaod.
Qhi qé gn'a de nouviao ? Dou vra bon qai dou dou-la : La suretiere d'enterprinzes Ecodia a piqhë des paniaos en Galo/Françaez La seretiere d'enterprinzes Ecodia a taet éternéy su Dinan (22). La qemunetë de parouésses de Dinan a encrouillae des paniaos Galo-Françaez dens les otieûs. Les paniaos-la ont taet tournae par la consortéy Chubri deude Rennes.
■