Dou drao dou drao e dou biao meins dame ét d'méme !

Ah dame je ne savae point qé gn'avae sitant de monde a leire le mot de bilhet-la pour ben dire. Je fût vra surprinz d'ercevaïr des berouétéys de messaïjes o l'articl de gn'a un coupl de semenes eyou qi taet mencion dou parcha de l'UDB. Ah dame ça huche pa'la, «le Lécuyer ét monvëz e delouz come diabl e il a ene hinje su l'UDB ao parsu». Nena dame je n'së mai point hinjouz su l'UDB ou su d'aotr, p'un brin. Je së monvëz cant q'c'ét qé le galo ét minz come la monvëze béte. Cérs lizous, v'étes tertout a huchae cant q'c'ét q'i n'ét point mencion dou berton dens un qhesionere ou ben ene ensercheriy parème bah dame ça deu yetr de domé pour le galo admézë. Les veus de l'UDB q'il on ecrit le parcha-la su les jieunes s'orinitent dens un enserche q'i fût m'néy par le CIJB. Dens l'enserche-la i n'taet pâs contançe des langes bertones e galeizes, dame ça huchit pa'la, les etourous bertons fûtent jujës ben jujës e ça s'ebahit tant qé pu. O nous-aotrs ét d'domé, je ne voulons point vaïr de parchas q'ont a r'vaïr o des qhessions qhultural ou ben core langaïjouzes qi s'rë point contançe dou galo dedens.

Depés berouéy qé je së a dire ès consorteriys bertones : gn'a pechë a ne point fere cas dou galo admézë, ét un cllot qé les etourous bertons araen melhour temp de m'në dens les anës a v'ni en pllace qé de les lèrae en chaochaoua. Maoçion !