Miz zo bennak (d'an 30 a viz Mae an hini e oa) em boa lakaet un toullad linennoù en ABP : (voir notre article) da ziskouez pegen pell emañ ar gerioù eus ar wirionez e stal ar FNAC e Roazhon, ma weler un toullad skritelloù brezhonek, evel an hini « Levrioù », ha levr brezhonek ebet er stal.
Ha pemzektez goude, petra lenner e kazetennoù ar vro ? Roet d'ar FNAC –se unan eus Prizioù Rannvroel Dazont ar Brezhoneg gant Ofis ar Brezhoneg.
Klevet em eus lavaret (ne welan ket se skrivet neblec'h) e vez roet 1.000 euro da loreidi ar priz. Ma'z eo gwir e c'hallo ar 1.000 euro-se servij da brenañ levrioù brezhonek da lakaat er stal, ur c'heloù mat, neketa ?
Kavet e vo levrioù brezhonek er stal diwar vremañ eta, hag adalek neuze e vo meritet ar priz.
A-hend-all, ma ne vefe levr brezhonek ebet, ne vefe nemet goapaerezh ouzh genoù ar vrezhonegerien ha lennerien vrezhoneg evel-just. Met se, n'hall ket bezañ.
■Ha koulskoude ne soñj ket diñ e naac'hfe ar vFNAC da lakaat levrioù e brezhoneg war well hag evit prenañ, ma'z eo goulennet diganti gant OaB evel just.
En ur lâret se e teu din e'm eñvor gerioù lennet dindan bluenn he rener kentañ André Essel ec'h añv (e-barzh kazetenn FNAC, war-zu he pratikoù) : «une entreprise ne peut pas aller contre la loi». Lâret e voe ur frazenn-se e-giz-se pe dost e maread lezenn Lang da-geñver priz al levrioù.
Setu perak, ar vFNAC - ma chom un dra-bennak d'he spered kentañ - ne c'hellfe ket c'hoari gant gwenneien ar Vreizhiz (ma vefent brezhonegerien pe get).
Trugarez deoc'h evit ar pennad-se.
Setu perak n'eo ket anat lakaat levrioù en hor yezh da vont e-barzh...»
1) m'eo gwir pezh a lârit e c'heller cheñch doareoù mont en-dro ar stalioù atav, evito da glotañ gwelloc'h gant ar pezh a vez goulennet gant ar brenerien (lezenn ar marc'had, pea)
2) ha ne vez ket kavet levrioù e saozneg, alamaneg pe spagnoleg un tamm e pep lec'h e diabarzh harzoù ar C'hwec'hkorn (en dachenn «vroadel» ma fell deoc'h)? Brezhonegerien a zo en tu all da Vreizh-Izel ivez, eveldon da skouer. Pezh zo, ne ouezer ket ha niverus int. Met kavet e vo tud da brenañ... pe get, evel evit pep levr. E mediaoueg Poitiers ez eus levrioù brezhonek, un nebeud re. Neuze?
Hag ar memes Priz Rannvroel Dazont ar Brezhoneg dezho o-daou.
Dre ma sell ouzh ar prizioù roet gant an Ofis publik en anv Rannvro Breizh e respontan d'ar pennad-mañ. Goap ouzh ar vrezhonegerien eme Mark Kerrain, feiz ne gredan ket met pep hini zo libr da soñjal ar pezh a gar evel-just.
N'eo ket bet roet prizioù dazont ar brezhoneg d'ar FNAC peogwir e werzhe (pe ne werzhe ket, anat deoc'h) levrioù brezhoneg. Roet eo bet ar prizioù peogwir e oa bet staliet gant FNAC Roazhon ur panellerezh divyezhek er stal evit ar wezh kentañ e Frañs. Gant ar priz zo bet roet dezho ez eus bet c'hoant gant ar juri da lakaat war wel ar striv-se a-berzh ur stal vras diazezet e Pariz, gant ar spi da welet stalioù all ar FNAC d'ober kement-all war-lerc'h ha gant ar spi e c'hallfe ar skouer-se talvezout ivez da stalioù bras all pe e vefent stalioù diazezet e Pariz evel ar FNAC pe stalioù eus ar vro.
Tud zo a garfe bevañ en ur bed dispar ha reizh ma vefe doujet d'hor yezh gant an holl e pep lec'h e kement degouezh zo. Kalz a stalioù pe embregerezhioù ne reont ket netra gant ar brezhoneg. Pa vez ur stal arouezius a grog d'ober un dra bennak e c'haller kaout emzalc'hioù disheñvel en he c'heñver. Tu zo da skeiñ ganti dizamant peogwir ne'z a ket pell a-walc'h. Tu zo ivez da reiñ mel evit ar pezh zo bet graet, gant ar spi e vroudo anezhi da genderc'hel gant an hent nevez bet dibabet ganti. Evel ma lavare an dud gwechall, da lakaat an azen da vont war-raok, e c'haller reiñ taolioù bazh dezhañ sur, met boueta anezhañ n'eo ket fall ivez a-wechoù.
Hir eo an hent, ha goustadik e cheñch ar bed, met cheñch a ra, tamm-ha-tamm, ha diviz ar FNAC a ziskouez deomp an dra-se.
Fulup Jakez
Rener Ofis Publik ar Brezhoneg