Naig ar Gars a stourm a-enep an OGK
ABP - Ar stourm a-enep an OGK e Breizh : un dra nevez eo evidout ?
Naig ar Gars - N'eo ket. Dibaoe ma'z eus anv eus an OGK, hon eus stourmet a-enep, e Breizh hag er Rannvro. Eno e oa bet kemeret an diviz e miz Here 2004, anvet «adalek ar parkeier betek an asiedoù». Ha setu an destenn bet embannet gant JY An Drian d'ar mare-se :
STURLEVR HEP OGK E BREIZH
Un tamm mat eus dazont al labour-douar hag ar gounezvouederezh e Breizh a vo savet dre forzh strivañ evit ar c'halite, war gement tachenn zo. Setu perak e ouestl ar C'huzul-rannvro
skoazellañ al labourerien-douar vreizhat a ra diouzh diarbennoù mat koulz evit al labour-douar hag evit an endro (MAE), e harp diorroadur al labour-douar biologel pe ar sevel loened gant geot, hag e vroud diorroadur an arouezioù ofisiel a galite (AOK, labelioù).
Al labour evit Breizh hep OGK, adalek ar parkeier betek an asiedoù, a vez graet penn-da-benn hervez ar memes doare da welet an dazont. Da bep live e vez kaset da benn : e Breizh, asambles gant an holl obererien empleget, e Frañs, gant Kevredigezh Rannvroioù Frañs, hag ivez en Europa, ma'z omp engouestlet mat e Rouedad an 49 rannvro eus Europa frank hag OGK. E-touez an traoù bras zo da brederiañ warno emañ tiketennadur ar produioù deveret diouzh loened maget hep OGK, talvoudekadur ar strivoù graet gant ar genadoù, pe levr glas Bodad europat a-zivout kalite ar produioù hon eus pledet gantañ.
Hogen, an engouestl-se ne dalvezfe ket da galz a dra hep skoazell ar vevezerien a sell ar c'hudennoù-se outo da gentañ penn. Se zo kaoz ez adembann ar C'huzul-rannvro ar sturlevr-se : gantañ e c'hallo pep hini divizout debriñ boued hep OGK gant e ouiziegezh. Gant an diviz-se e vo kreñvaet al labour-douar padus hag a galite e Breizh, evit mad an holl deroueroù hag an holl geodedourien.
ABP- Ar pezh a zo bet graet d'ar 5 a viz Mae e St Allouestr : hag efedus e vo seurt abadenn evit lakaat an traoù da vont war-raok ?
Naig ar Gars Just a-walc'h, aze e fell deomp mont pelloc'h evit an diskleriadurioù ha diskouez frankoc'h hon enebiezh d'an OGK ha d'an embreregezhioù a bled ganto. Seurt oberiadenn a lak war-wel kudenn an OGK hag a zegas an diviz dirak an holl.
ABP - Petra eo pouez strollad Udb-Ar Re c'hlas evit klask cheñch hent ar Rannvro a zo kentoc'h evit kalonekaat al labourerien-douar hag an embregrezhioù bras ?
Naig ar Gars - Nebeut e gwirionez, met ne vir ket da ober al labour : kenskoazell gant ar stourmerien a-enep OGK hag evit al labour-douar en ur mod all. Enebiñ ouzh an tu kreñv ivez pa vez kemeret gantañ diarbennoù fall ha klask cheñch anezho dre ginnig mennadoù. Fellout a ra deomp bezañ mouezh ar stourmoù rak a-wechoù ez omp klevet ha selaouet muoic'h.
ABP - Peseurt dazont e welez evit Breizh : gant OGK ? Hep ? Un nebeud anezho?
Naig ar Gars - Hep a OGK evel-just. Evit ar session o tont, emaomp o prientiñ ur mennad a vo kinniget da votiñ a-benn :
- goulenn ur gourzez (moratoire) diwar-benn an OGK
- tikedenniñ ar produioù OGK enno
- difenn e vefe OGK evit arouezioù ofisiel a galite (labelioù, AOK...) ha produioù «merk Breizh», anezhañ broudet gant ar rannvro.
War hir dermen, e c'houlennomp atav an emrenerezh e Breizh evit divizout ar pezh 'zo mat evit Breizh. An diskoulm nemetañ an hini eo evit henchañ ar vro war un hent dereat a-fet labour douar hag endro.
■