2010 : ar merc'hed a gomz, a skriv, a gan hag a stourm

Diaes eo er gevredigezh dispartiañ ar merc'hed diouzh ar baotred. Ret eo anzav koulskoude ez eus bet traoù brav graet gant ar merc'hed er bloaz-mañ : Irene Frachon, stourmerez ha pneumologourez a zo deuet a-benn da brouiñ e oa fall-put ar Mediator. Gant Magali Diennet ha Dom Williams ez eus bet graet ur sapre labour ivez : dont a-benn da vodañ kement a dud dindan ar glav e Ploure, da lakaat holl dilennidi ar vro a-enep raktres GDE.

Eus tu ar sonerezh, diaes eo gouzout piv zo trec'h etre Nolwenn Leroy, Cecile Korbell, Nolwenn Korbell, peadra da veskañ, met disheñvel-tre eo an teir c'hanerez koulskoude : heuliet e oa bet hent ar Star Ak gant an Dimezell Leroy a zo aet da ganañ en-dro tonioù milvrudet Alan Stivell hag ar re all.

Hent Japan he deus kemeret an delennourez hag evit ar penn-sardin, hent ar c'hrouiñ gant he yezh vamm, gant ur golo CD a ya a-enep krenn klichedoù klipoù video ker-spontus troet gant skipailh Nolwenn : Breizh gant reier, sorserien, ar mor, hag ur strollad tud baba-cool evit an ton "kazeg Michao".

Eus tu al lennegezh e brezhoneg hon eus bet un dispac'hig ivez : Maiwen Morvan gant "Buhez prevez Lola P.", Ninnog Latimier, gant troidigezh "Ar forzhioù a gomz".Souezhet ez eus bet kalzik a dud gant al lennegezh nevez-se. Cheñch a ra, gwir eo, diouzh sell ar baotred, milanavezet evel Goulc'han Kervella, Yann Gerven,Herve Lossech ...

Hag ar politikerezh emit-hu ? Deuet eo Lena Louarn da cheñch ivez liv ar Rannvro,o kenderc'hel gant un hent a labour hag a nerzh. Mona en UDB a ren ur strollad politikel rannvroel, ar pezh a zo nevez ivez. Maer Plijidi, itron Barbedette, eo arrouez ur bolitikourez hon diije c'hoant da gaout e pep lec'h e Breizh : graet he deus he seizh gwellañ evit degemer eus ar gwellañ tout ur skolaj e brezhoneg e Plijidi daoust d'ur c'huzul meur ne oa ket gwall entanet.

Eus tu ar mediaoù, mat e vefe diskouez tout al labour kaset da benn gant skipailhoù ar radiooù e brezhoneg e lec'h e vez kavet merc'hed e-leizh : Laetitia, Pauline, Lou, Solenn, Erell, Joann, Cecile, Andrea, Catherine... Ha se zo nevez ivez ; a-raok e Bleu Breizh izel e veze klevet mouezhioù Gi ar C'horre, Bernez Grall, Clement Soubigou ingal... E Webnoz, Corinne ar Mero a gas ur sapre labour da benn.

Ha ne faot ket din disoñjal tout al labour graet gant ar skolaerezed, ar renerezed, ar mammoù, re AEPoù, c'huzulioù skoazell, a lak ar skolioù hag ar c'hlasoù e brezhoneg da vevañ, da gaout arc'hant, met ivez da lakaat bugaligoù Breizh da gomz e brezhoneg bemdez.