Ur wech e oa, Douar ar Baganiz

Edo an avel o yudal p'en em gavis e terouer Meneham e parrez Kerlouan d'ar 26 a viz Here. Diwar an hent e welen beg ur wern uhel en aod e-touez ar reier. Klaoustre e oa bet taolet ul lestr eno gant ar mor diroll. En ur dostaat avat e voe anat din ne oa ket anezhañ ul lestr peñseet e gwir. Ar wern-se a oa bet unan eus teir gwern Bag an Ankou. Ul lestr estlammus m'en doa Loeiz Benig bevet en e vourzh troioù-kaer ha spouronus etre Rekourañs, Londrez ha Molenez. Bremañ edo lakaet ar wern gozh da labourat adarre, da vezañ test ur peñse spontus o tegas d'e heul gwalleurioù skrijus.

Nikolaz Hervoches, filmsavour anezhañ, a oa Douar ar Baganiz war e spered pell oa. Kroget en doa d'ober filmoù Super 8 pa oa paotr yaouank. E vennozh e oa gellout sevel ur film bras e Meneham gant tud ar vro. Ur peur bennak ! E 2010 e oa bet dibabet asambles gant c'hwec'h film-skrivagner all, gant Groupe Ouest. Setu e hunvre o tont da wir, pe dost.

Kemer a ra perzh e raktres Groupe Ouest : Ur wech e oa pemp. Diwar an istor-film en deus skrivet Nikolaz e vezo savet tri rak-film. Evel-se, diwar ar filmoù berr, e c'hello ar sevenour yaouank, deskiñ penaos sevel ur film hir, diwezhatoc'h. Tro dezhañ ivez da gemer perzh e raktres bras Groupe Ouest ; krouiñ ur gwir studio sinema e Bro Bagan. Ha gant plijadur !

Petra eo Groupe Ouest 'ta ? Ur gevredigezh an hini eo, bet savet e 2006 diwar intrudu Anton ar Bos, ur film-skivagner bet ganet e Landerne. Pevar den a-vicher zo o labourat er gevredigezh-se, tud a-youl-vat ha meur a vadoberour o reiñ arc'hant da gas ar stal en-dro. Lakaat sevel filmoù hir e Breizh eo o mennozh en ur implijout tud ar vro hag a zo barrek war arz ar sinema. Da lavaret eo krouiñ filmoù azalek ar penn kentañ betek ar penn diwezhañ, asambles gant tud Europa a-bezh. Unan eus o labourioù pouezusañ eo pleustriñ war an teknikoù hag an ardivinkoù nevesañ, arnevesañ.

Teknologiezhioù nevez : 3D, pellgomz...

An teknikerezh arnevez eo pal ar raktres Ur wech e oa pemp just a-walc'h. Ur c'henlabour gant Rann ar skeudennoù ha rouedad Telecom Breizh. Ur filmig teknik ordinal, ur filmig 3D hag ur filmig gant ur pellgomz hezoug a oa bet savet diwar istor Nikolaz Hervoches e Meneham etre an 23 hag an 30 a viz here.

Ar filmouigoù-se, rakfilmoù Douar ar Baganiz, eo ar re gentañ bet sevenet gant Groupe Ouest hag a oa bet diskouezet d'an dud, da geñver Festival ar filmoù berr e Brest (8-14 a viz Du). Fellout a ra d'ar Strollad lakaat sevel daou pe dri film hir e Breizh bep bloaz. Ken dillo all e vo Douar ar Baganiz unan eus ar re gentañ anezho.

Ur bloavezh fonnus evit Groupe Ouest ! Estreget filmañ emañ o labourat war ur raktres bras all : lakaat sevel ur greizenn fiñvskeudennoù e ti-gar kozh Plouneour-Traezh. Loc'het eo an traoù a-gevret gant Kumuniezh Lesneven hag ar Vro Bagan. Da zibenn 2011 e tlefed stagañ gant al labourioù.

N'eo ket toc'hor Douar ar Baganiz c'hoazh ! Yac'h ha dibikouz, ne lavaran ket. Kalz a draoù en deus da zeskiñ deomp c'hoazh.Digorit mat ho tivskouarn ! Emañ Nikolaz Hervoches, puchet a-dreñv e lagad-kamera, o vont da zisklêriañ deomp kontadennoù kuzh, mojennoù sebezus hag a lakaio hor c'halonoù da dridal ha da skrijal.

Pennok eo an den evel ar... Baganiz ! P'en devez paket peg en un dra bennak n'eo ket aes e lakaat da ziskregiñ. Ha pebezh enor evit Plouiz-Eneour ! Prestik ez aio ar vrud anezho en tu all d'ar mor.

Yann-Vadezour Bourgoin

Brezhoneg gant Goulc'han Kervella