Stumdi : 1añ staj war ar skrivañ senarioioù heuliadennoù brezhonek evit ar skinwel
Aozet ez eus bet, evit ar wezh kentañ e 2009 gant ar greizenn stummañ Stumdi, arbennikaet war ar stummadurioù war ar brezhoneg evit an dud deuet, stajoù etre 6 ha 10 devezh d'an daoulamm. Bez eo ar stajoù-mañ evit an dud a-vicher a zo brezhoneg ganto dija hag o deus c'hoant da wellaat o anaoudegezhioù war ar yezh, dre geriaoueg ha teknikoù stag ouzh o micher.
Savet ez eus bet daou stummadur :
- Stummadur evit an dud a zo o micher labourat gant bugaligoù (desaverezed bugaligoù, animatourezed er magourioù, skoazellerezed...) ;
- Stummadur evit ar re a zo o micher labourat gant ur media. Ar stummadur-mañ a zo graet, war un dro, evit ar gazetennerien a fell dezho gwellaat o brezhoneg ha graet eo ivez evit ar re a fell dezho dizoleiñ an holl vediaoù brezhonek (skinwel – skingomz – kazetennoù...).
Evit kenderc'hel gant ar stajoù arbennik kinniget d'an dud a-vicher ez eus bet savet gant Stumdi, e penn kentañ miz Genver 2010, ur staj anvet :
Staj war ar skrivañ senarioioù evit heuliadennoù abadennoù skinwel brezhonek
E gwrionez n'eus ket a heuliadennoù brezhonek evit ar skinwelioù, hag o welet ar berzh graet gant an heuliadennoù gall pe saoz e-touez an holl arvesterien emañ ar chadennoù rannvroel (Frañs 3, TV Roazhon 35...) o c'hortoz seurt raktresoù. Kinniget ez eus bet neuze, hag evit ar wezh kentañ e penn kentañ 2010, ur staj arbennik e lec'h m'o deus gallet ar stajidi deskiñ an teknikoù rekis evit sevel abadennoù un heuliadenn, e brezhoneg. Kalanna, kevredad produiñ kleweled e penn ar raktres, en deus kemeret perzh er staj-mañ ha roet eo bet steuñvenn an istor ganto. Ha Dizale, kevredigezh produiñ kleweled, en deus kemeret perzh er raktres ivez o tegas e varregezhioù teknikel. An darn vrasañ eus ar stajidi a labour dija gant ar media-mañ-'r-media hag a oar petra eo skritur ar c'hleweled.
Gant ur senarioour iwerzhonat a-vicher, Tadhg Mac Dhonnagain, eo bet renet ar staj-mañ. Hemañ diwezhañ a zo, war un dro, senarioour, kinniger, produour ha barrek a-walc'h gant ar brezhoneg evit stummañ ar stajidi war-eeun dre ar brezhoneg. Ur stummer eus Stumdi, Drian Bernier, arbennik war ar stalioù-skrivañ brezhonek abaoe bloavezhioù, en deus skoazellet anezhañ, o kontrolliñ live ha kalite ar brezhoneg evit pep pazenn eus ar stummadur.
Ur staj nevez, plijus-kaer... da adober hep dale
"Splujet" o deus ar stajidi e bed ar senarioioù ur sizhun-pad. C'Hoant o deus d'en em adkavout c'hoazh evit peurlipat o skridoù ha perak ne vefe ket, adober ur seurt taol-arnod er bloavezioù da zont ha skrivañ heuliadennoù nevez.
« Ur stummadur plijus-kenañ hag a-drugarez dezhañ em eus komprenet e kreden gouzout skrivañ... met evit gwir n'em boa ket teknikoù gwir evit skrivañ. » Anv bihan pe lizherennoù kentañ ?
« Kemeret em eus perzh e meur a staj e-doug ma red-micher, met ar wezh kentañ an hini eo e teskan kement dindan ur sizhunvezh. A-drugarez d'ar programm ha d'ar stummerien omp deuet a-benn da gaout barregezhioù nevez. » Anv bihan pe lizherennoù kentañ ?
O welet ar berzh graet gant ar stummur kentañ-mañ e soñj skipailh Stumdi adkinnig seurt stajoù ur wezh ar bloaz.
Claudie Motais / Drian Bernier, Landerne, d'ar 27/1/2010
Evit gouzout hiroc'h : Stumdi – maner Keranden – BP 311
29800 Landerne
bzh.stumdi@wanadoo.fr
(voir le site)
pgz . : 02 98 21 39 94