Santeg : dek ober evit al live 2 ya d'ar brezhoneg

Sinet e oa bet ar garta Ya d'ar brezhoneg d'an 9 a viz Here 2009 gant Bernard Le Porz, maer Santeg, dirak meur a zilennad, en o zouez an ao. Nicolas Floc'h, maer Kastell-Paol ha prezidant Kumuniezh kumunioù bro Leon. Gant ar C'huzul-kêr e oa bet votet kas da benn 10 ober dindan daou vloaz.

A-benn gounit al label live 2 en deus dibabet skipailh ar maer sevel un endro brezhonek ha kregiñ gant ar vuhez pemdeziek en ti-kêr.

Implijet e vo ar brezhoneg, seul daol, evit ar pedadennoù gant an ti-kêr, pennad-stur kazetenn ar gumun, kartennoù-bizit an dilennidi hag ar paper-lizher talbennet. Divyezhek e teuio da vezañ logo Santeg koulz ha kemennadenn responterez an ti-kêr. Mod-all e vo staliet panelloù divyezhek e diabarzh hag e diavaez an ti-kêr. Heñvel a vo graet evit panelloù mont-tre ha mont e-maez ar gumun.

Santeg eo an trede kumun e Kumuniezh kumunioù bro Leon o kemer perzh en argerzh-se.