Kampionad Breizh Mell droad gouezelek. Kroget vo en dro e Gwened

Goude un devezhiad kentañ a oa sañset bezañ e Naoned d'an 13 a viz Kerzu hag a oa bet daleet diwar abeg an amzer fall, e vo boulc'het gant ur sezon nevez evit kampionad Breizh Mell-droad gouezelek, d'ar 7 a viz C'Hwevrer e Gwened, e tachenn sport ar Foso, etre 1 eur ha 6 e 30 goude merenn, hag a zalc'ho da vont gant un nozvezh er pub O'Flaherty.

Mall zo war ar 6 klub breizhat perzh er c'hampionad er bloaz-mañ, kregiñ ganti en dro, dreist-holl evit daou vidoc'hig al lig : ar Gaelic Football Bro Dreger (Sant-Ke-Perroz), ha Gwened Vannes Football Gaélique a zo en o soñj en em zibab brav evit o c'hampionad kentañ.

An eil degouezh a-bouez eo aozadur an devezhiad-mañ evit skipailh Gwened, a zo bet savet un nebeut mizioù zo hepken, tro dro d'ur strolladig kreñv a dud sot gant ar sport-mañ. Ganto oa bet aozet brav e miz Du ur stummadur evit ar c'hourdonerien.

Ur gouel a gampionad, dindan paeroniezh Sant Padrig ha Sant Erwan

Pep devezhiad kampionad a zo un tournamant anezhañ, degemeret gant unan deus kluboù al lig, hag a vod an holl skipailhoù all. A-benn fin an devezhiad e vez roet un niver a boentoù da bep skipailh, hervez renkamant an tournamant. Mont a ra ar maout gant an hini a vo ar muiañ a boentoù gantañ da fin ar c'hampionad, o tont da vezañ kampion Breizh. Un digarez eo an devezhioù-se da reiñ un tañva d'hor sport : abadennoù kizidikaat, digor d'an holl, lusket gant ar c'hoarierien, a vez aozet tro dro d'ar c'hrogadoù.

Prantadoù festek a zo eus an devezhioù-se bevet gant ar c'hoarierien ha kement hini a zo kar ouzh ar sport dibar-se, bez' ez int ivez digarezioù brav da zizoloiñ ha da gaout un tañva evit an holl.

Mod-all e lido bed breizhat ar mell-droad gouezelek gouel Badrig da-geñver tournamant Brest d'ar 14 a viz Meurzh hag e vo roet lore ar c'hampion Breizh d'ar 16 a viz Mae 2009 goude tournamant Liverieg, aozet gant ar c'hampion 2008, da-geñver gouel Erwan.

Deiziadur ar c'hampionad

• 1añ devezhiad : d'ar sadorn 7 a viz C'Hwevrer 2009 e Gwened ;

• 2il devezhiad : d'ar sadorn 28 viz C'Hwevrer 2009 e Naoned (tournamant an 13 a viz Kerzu 2008 daleet) ;

• 3de devezhiad : d'ar sadorn 14 a viz Meurzh 2009 e Brest (tournamant gouel Badrig) :

• 4re devezhiad : d'ar sadorn 25 a viz Ebrel 2009 e Sant-Ke-Perroz ;

• Devezhiad klozañ : d'ar sadorn 16 a viz Mae 2009 e Liverieg (da-geñver Gouel Erwan)

---------------------------------------------

Darempred - Kleub Gwened

Gwened Vannes Football Gaélique (voir le site)

Cyril Beyssere - 06 01 93 88 26