Al label Ya d'ar brezhoneg gant kumun Ploueg-ar-Mor

Roet e oa bet al label live 1 gant Lena Louarn da Jacques Mangold, maer Ploueg-ar-Mor, d'an 23 a viz Genver 2009. Evit kenderc'hel gant an hent-se eo bet divizet sinañ da dapout al label live 2 a-benn 3 bloaz.

C'Hwec'h ober a zo bet kaset da benn gant kumun Ploueg-ar-Mor betek-henn, ha ganto he deus bet al label kentañ. Holl banelloù mont e-maez ha mont tre er gumun a zo divyezhek. Kartennoù-bizit an dilennidi, paper-lizher ar gumun ha responterez an ti-kêr a zo divyezhek. Logo Ploueg-ar-Mor a zo en div yezh ha kinniget e vez pennad-stur kazetenn an ti-kêr en div yezh ivez.

Evit lakaat brezhoneg war wel muioc'h e buhez pemdeziek tud Ploueg-ar-Mor, e vo kaset da benn meur a ober ac'hann da 2012. An holl gartennoù-pediñ savet gant servijoù an Ti-kêr a vo divyezhek. Ur panellerezh divyezhek a vo staliet e diabarzh hag e diavez an ti-kêr ha war kement savadur a zo dindan e zalc'h. Ur panellerezh-heñchañ divyezhek a vo staliet war douar ar gumun. Kement plakenn-straed nevez a vo divyezhek. Ha sinet e vo ur gevrat-kefridi gant Ofis ar brezhoneg a c'hallo skoazellañ da sevel an oberoù-se.